1- ‘E scarpe scalcagnate

Dint’o core tengo ‘e pampuglie,
s’appicciano juorno e notte;

dint’e mmane tengo
‘o granone pe’ palumme;

‘ncapa tengo
‘e perucchie chin’e sango;

dint’a ll’uocchie
tengo ‘o viento ca trattengo

quanno a’ paura
me piglia;

dint’e cosce tengo ll’arteteca e
ll’argiento vivo;

dint’o stommaco tengo
sempe nu murmuliamiento

‘a Voce m’ha ditto ca songo
‘e parole d’e poeti;

dint’a casa tengo
a bella mbriana e sette spiritilli;

ma tengo nu solo pare ‘e scarpe:
songo tutte scalcagnate e ogni notte

me parlano e
vonno essere accarezzate

comme si fosseno
ddoje criature.

2 – Dint’o core

Si io fosse viento e
tu nuvola

te curresse dint’o core e
ppò te vucasse

doce doce
ncopp’o mare.

si io fosse mpazzuto ‘e te
m’ammesurasse

pure cu ll’ommo
cchiù forte d’o munno.

si io fosse auciello e tu
‘a canaria,

screvesse ‘a musica
‘e ll’anema.

si io fosse
‘o frutto cchiù ‘nzuccarato,

me facesse magnà ‘e vase
d’a vocca toia.

si tu fusse
‘a mano d’o core

e io scemonuto
‘e te,

nisciun’o munno
fosse capace

e spezzà stà catena
d’acciaio,

c’addiventa ‘e mollica
quanno tu me vase

cu ‘e labbra ‘nfose
‘e stelle,

pe’ sta pecundria malata,
ca me stracce

‘mpietto.

;)